A L’È RIVAJE ‘L CARLEVÈ
A l’è rivaje ‘l carlevè
fin-a ël gal a l’è andà a viè
a l’è andà a viè da la galin-a
a l’avia ne pan e ne farin-a
oi galin-a a pijeme mi
che mi sôn ‘n bôn partí.
A l’è vni ora d’andè a durmì
i doi spos as pronto ‘l nì
a l’han girà tuti i canton
a l’han trovà ‘na testa ‘d mon
e na pera për cussin
ciao galin-a durmì bin.
A l’è rivà la matinà
i doi spos son prest aossà
son ciapasse për brassëte
e sü e giü për cole viëtte
sü e giü për coi viott
spicasandse ‘l barbarôtt.
E ‘na sposa ‘nt una cà
a l’è ‘na grand necessità
chila a lava, a fa lissià
a cudis la lingeria
a tacon-a i to caosett
ch’a së scianco ‘nt ij garett.
Mare mia deme ardriss
‘t vëdde nen che mi patiss
‘t vëdde nen che mi ‘m consum
come a fa l’euli ‘n tal lum
Mare mia sto carlevè
‘l me moros mi veui posè.
O marieve gioventù
e guardè pa tant la scù
mi i son pijame ‘na ‘rditèra
chila l’è rica pa vaire bela
e mi son pa ‘l cas ‘d parlè
che le scale am fa volè.
